القاهرة - الدار البيضاء
كشف الشاعر أيمن بهجت قمر، لأول مرة تفاصيل خلافه مع الفنان الإماراتي حسين الجسمي، مؤكدًا أن الخلاف بينهما بسبب طلب الأخير التنازل عن كل حقوق الملكية الفكرية، ونفى أيمن ما تردد عن تقديمه دعوى قانونية ضد الجسمي، لافتا إلى أنه لن يدخل أي منازعة قضائية مع المقربين من أصدقائه المطربين، ولكنه طلب عبر مخاطبات رسمية تسوية الموقف المالي بين الطرفين.
أضاف أيمن بهجت قمر في لقائه مع الإعلامية إيمان أبوطالب، ببرنامج «بالخط العريض» المذاع عبر قناة الحياة: أنا وحسين الجسمي عدينا مرحلة إننا نتخانق على التنازلات وصيغتها، لأن مفيش بينا كده إحنا إخوات ومفيش بينا شيطان، وفي بينا نجاح وكيمياء حلوة، ولكن فوجئت إن هو باعت صيغة تنازل ملهاش أي مبرر، كأني بديله حقوقي وحقوق ولادي وأحفادي، يعني بديله كل حاجة وكأن أنا ليس لي أي حق أدبي ولا مادي في الأغنية، وبلا مبرر.
وأضاف أيمن بهجت قمر، أنه حقق العديد من النجاحات مع الفنان حسين الجسمي، قائلًا: يعني إحنا نجحنا مع بعض من أيام، بحبك وحشتيني، لغاية بالبنط العريض، وحتة من قلبي، اللي نزلت الفترة الأخيرة، إحنا الحمد لله طول الوقت ناجحين مع بعض، والسنة دي نزلنا أغنية تتر مسلسل وسط البلد.
وأضاف: وأنا قولت له يا حسين، المنطقة بتاعت التنازلات والعقود دي بيدخل فيها الشيطان، وأنا عمري ما غدرت بيك في حاجة ولا بعتلك أي إنذار، وعمري ما طمعت فيه.
وواصل قائلا: مفيش خلاف لي مع حسين على حاجة، ولكنه عايز ياخد كل الحقوق اللي بينص عليها قانون الملكية الفكرية، ولكن في حقوق مبنتنازلش عنها، زي حقوق الأداء العلني، وحقوق إعادة النشر، ولو الأغنية حد عايز يعملها إعلان لا بد من الحصول على موافقتي.
وأشار إلى أنه لم يرفع قضية على الفنان حسين الجسمي، مؤكدًا أنه لن يتخذ هذا الإجراء مع أي من أصدقائه، قائلًا: مفيش قضية مرفوعة، أنا مرفعتش عليه قضية ومش هرفع على حد من صحابي قضية، هي مخاطبات وفي محاسبات نشوف أنا ليا إيه، وسايب له إيه ومخدتهوش، أنا عامل تاريخ كبير مع الجسمي، ولو مزادوش واحدة مش هتفرق، أنا عامل له أكتر من 20 أغنية وفي 15 منها مكسرة العالم.
واختتم حديثه قائلًا: لو حسين عايز يشتغل أنا موجود ولو مش عايز خلاص هو حر، ولكن أنا كمواطن عربي بشتغل مع فنانين كتير كبار، ولكن حسين دخل الشيطان في العقود، ابعد عن حقوق الناس، خد حقك في الغنوة اللي أنت عاملها واتبسط، بس ابعد عن حقوق ولادي.
قد يهمك ايضاً