القاهرة - الدار البيضاء اليوم
نشر الفنان تامر حسنى تعليقا عبر صفحته على موقع التواصل الاجتماعى فيسبوك يوجه فيها رسالة إلى المحبطين.وقال تامر حسنى : قرأت معظم التعليقات على قد ما قدرت على آخر بوست ليا اللي تحت دا، و فهمت اكتر حاجتين من تعليقاتهم عاملين احباط لمعظمكم.
١- اليأس من النجاح
٢- احباط المقربين
و بعضكم واصل لفقدان الأمل و الشغف و بعضكم فاقد اأامل في الحياه نفسها
هطلب طلب منكم قبل اي شيء افتكروا معاناتي في بدايتي و ظروفي الصعبة من غير أب و من غير أي فلوس و بنزل اشتغل في الشوارع من عامل بنزينه لسوبر ماركت لفواعلي يعني اللي بيبنوا العمارات بطلع طوب وأسمنت عشان ارجع بيتي لأمي الغلبانه بخمسة جنيه بالإضافه لمرتب النادي.
وأضاف تامر حسنى : لما كنت بلعب كوره كان مرتبي ٢٢ جنيه في الشهر منهم بقى تحويشة الميه و الكهربا و عمليات أخويا عشان كان عيان لفترة كبيرة كنت بعمل المستحيل فعلاً عشان أمي وأخويا و عشان أوصل لهدفي ، كان جوايا سعي دائم لطريقين الكورة و الغناء و بقول دا عشان ناس كتير عايز انصحها بالخطو البديلة عشان لو الحلم مجاش يكون في غيره زي ما آنا كان نفسي ابقى لاعب كورة و الكورة مش ليا و الأنديه كلها مشوني رغم تفوقي كنت بسأل نفسي ليه الأبواب كلها بتتقفل في وشي اتاريها بتتقفل عشان توجهني لمسار آخر.
وأوضح تامر حسنى : ولما آمنت بكده فهمت قدام إن ربنا كان شايلي الأحسن بس ساعتها مكنتش فاهم ،، واللي بيسأل نفسه دلوقتي يعني انا اكمل في حلمي ولا اشوف حلم تاني هقوله دايماً اطلب من ربنا يساعدك هتلاقي علامات بتجيلك بس الشاطر اللي يفهمها ، علامات هتأكدلك تكمل او لا بس اجتهد و اتعب عشان المجهود دا ليه كرم متحوشلك في مجالك التاني ف اوعى تقول تعبت عالفاضي ، و بالنسبه للمحبطين هيفضلوا موجودين انت اللي بتسمعلهم و انت اللي بتسمح انك تتأثر بيهم امنع دا فوراً متبقاش السبب في اذية نفسك متتشدش غير لكل جميل و لكل ايجابي هتلاقي كل الحلو بيجيلك و متعملش العكس عشان هيجيلك برضو عشان كدا بقولك انت السبب دايماً قول يارب و اجتهد و افهم ان الراحه المطلقه في الجنه بس و احنا على الارض و ربنا قال انه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتير قبلينا كانت ظروفهم اصعب و وصلوا يبقى الموضوع فينا ، متبقاش اكبر عدو لنفسك ، انت السبب ، خد قرار صارم فوراً في التغير و النهوض و النجاح ، والله هتوصل متسمعش غير لقلبك و سلم قلبك للّي خلقه و توكل على الله.
قد يهمك أيضــــــــــــــــًا :
هنا الزاهد تهنئ تامر حسني على ألبومه الجديد